A cuarta edición da feira Vegana.gal celebrarase os días 26 e 27 de outubro en Vigo, cun programa cheo de actividades que abrangue dende o activismo e a gastronomía, ata espazos especializados para a infancia e unha zona B2B para profesionais. Este evento anual consolídase como o principal encontro vegano en Galicia, reunindo proxectos sostibles e emprendedores que promoven un estilo de vida respectuoso cos animais e co planeta.

• Outro dos pratos fortes desta edición é a presenza de Mauricio García Pereira (o sábado 26 ás 19:00 h), coñecido polo seu activismo tras destapar a crueldade dos matadoiros en Francia, quen ofrecerá a charla ‘Se os matadoiros tiveran paredes de cristal’. Mauricio, extraballador do matadoiro municipal de Limoges (o máis grande de toda Francia), exporá o sufrimento dos animais nos matadoiros, un testemuño impactante que busca concienciar sobre a urxencia de mudar o sistema alimentario. A súa historia de loita, superación persoal e compromiso co activismo non deixará indiferente a ninguén.
• Rocío Cano, socióloga e activista, presentará o sábado 26 ás 12:00 a charla ‘Crianza vegana desde unha perspectiva sociolóxica’. Cano achegará unha reflexión profunda sobre o impacto social e cultural da crianza vegana, explorando os retos e as oportunidades que esta decisión implica para as familias que buscan criar nun entorno respectuoso cos animais e o medio ambiente.

Unha feira para todos os públicos: xeral, infantil e sector profesional

Por suposto, a gastronomía tamén será un dos puntos clave da feira, cunha serie de showcookings que demostrarán que a cociña vegana non ten límites. O sábado, Marc Coloma, fundador de Heura Foods, liderará unha demostración culinaria baixo o título ‘A realidade oculta do sistema alimentario e que facer para mudalo’, mentres que Águeda Ubeira, de Vanetta Foods, presentará a súa visión sobre como ‘Reinventar a cociña tradicional’ o domingo.

Ademais, o público infantil contará cun programa especial, que inclúe Peque Ioga, contacontos, obradoiros creativos como a elaboración de monicreques reciclados e un espazo para xogar en familia con actividades divertidas como o circo de @atipicocirco. Este ano tamén se ofrecerán sesións de Mini Vegan Chef para que os máis pequenos se familiaricen coa cociña saudable.

Para os profesionais do sector, haberá un espazo B2B facilitado pola axencia de comunicación Mardy Bum, onde se impartirán charlas especializadas, como ‘Constrúe unha marca con personalidade no sector vegano’ e unha sesión de ‘speed dating’ o sábado 26, que conectará proxectos emerxentes con empresas consolidadas. O domingo, a charla sobre marketing de influencers para marcas veganas axudará a proxectos emprendedores a potenciar a súa presenza nas redes sociais e a achegarse a un público máis amplo.

Espazos de lecer e puntos de información

Na feira Vegana.gal tamén teñen cabida o lecer e a información. Esta edición repetirase o exitoso Skeirrum de hai dous anos, unha zona interactiva que ofrecerá diversión para os máis atrevidos. Ademais, haberá un punto de información nutricional a cargo de Nutricoles, onde os asistentes poderán resolver dúbidas sobre nutrición baseada en vexetais durante todo o día. Así mesmo, haberá a disposición do público unha libraría co máis selecto da temática para as diferentes idades. Este espazo contará coa presentación de libros e sinaturas de autoras como Rocío Cano, Cristian Alonso (@lapastanoengorda), Manel García @addictedtohumus) ou Miquel Cuenca (@elveganomarrano). Tamén se habilitará un espazo con actividades de xogo libre para bebés, co obxectivo de ofrecer unha experiencia accesible e cálida para familias.

A feira pecharase o domingo 27 ás 20:00, tras dous días de aprendizaxe, activismo e celebración dun estilo de vida vegano e sostible.

Lush, patrocinador e protagonista nos obradoiros

A marca Lush, coñecida polos seus produtos cosméticos éticos, é un dos patrocinadores principais desta edición. Lush ofrecerá varios obradoiros tanto para adultos como para os máis pequenos. Entre as súas actividades destacan os obradoiros de automasaxe, que se celebrarán ambos os días, e un divertido obradoiro de bombas de baño para nenos, unha excelente oportunidade para aprender a crear produtos naturais dun xeito lúdico.

Un evento cun forte apoio institucional

A feira Vegana.gal conta co apoio do Concello de Vigo e de Lush como patrocinadores principais, consolidando a súa relevancia como evento de referencia no activismo vegano e na promoción dun estilo de vida ético e sostible.

O evento se botará o peche o domingo 27 ás 20:00, tras dous días de aprendizaxe, activismo e celebración dun estilo de vida vegano e sostenible.

A importancia da participación cidadá nas decisións políticas

Para garantir un futuro máis xusto e sostible, é fundamental que as administracións públicas promovan estratexias a longo prazo que respecten a todas as especies e o benestar animal. Non podemos permitir que as presións de sectores tradicionais sigan freando o cambio.

Por iso, precisamos da vosa axuda. Este evento non é só unha feira, senón unha plataforma de transformación. A participación activa da cidadanía é clave para demostrar que hai outra maneira de avanzar.

Agradecemos ao Concello de Vigo o seu apoio á feira. Con este xeito demostra ser unha institución máis innovadora que outras entidades ligadas a modelos tradicionais. Sabemos que, xuntas, podemos acadar un cambio real na nosa sociedade.

Colabora cos santuarios e mellora a calidade de vida dos animais

Coñeces o traballo que fan os santuarios polos animais? Descúbreos e préstalles o teu apoio en @vegana.gal. Edición tras edición, os ingresos que obteñen os santuarios durante a fin de semana que dura a feira supoñen unha fonte de ingresos moi importante para que os animais poidan recibir atención veterinaria e alimentación para mellorar a súa calidade de vida, e para que os propios santuarios poidan acoller novos habitantes. Así que vos animamos a parar, escoitar e colaborar co merchan chulo que traen: camisetas, suadoiros, chaveiros, cuncas e moitas outras cousas. Sen dúbida, cartos ben gastados.

Na foto podedes atopar ao noso querido amigo Jose de @frentel.a.santuarioanimal Tedes que seguir o seu proxecto en redes porque é incrible.

A Feira Vegana.gal conta co patrocinio do Concello de Vigo e Lush.

A feira de mostras de referencia no sector vegan, celebrarase novamente no Recinto Feiral de Vigo (IFEVI) os días 26 e 27 de outubro de 2024

Vegana.gal, a feira vegana e sostible de Galicia, naceu o ano 2021 en Vigo como resposta á necesidade dun público esixente e implicado na procura de todo tipo de produtos que eviten os ingredientes de orixe animal na súa elaboración e composición. Segundo a organización, “somos conscientes do laborioso traballo que supón cambiar séculos e séculos de tradición usando aos animais como ferramentas ou meros obxectos de consumo. Por iso a nosa estratexia pasa por ofrecer alternativas que o público poida probar e experimentar que demostren que un mundo libre de crueldade non só é posible, senón tamén necesario. Ademais a ciencia aválanos, a lista de organismos que recoñecen e apoian un estilo de vida vegano non deixa de medrar, comezando pola propia Organización Mundial da Saúde”. É por iso que queren achegar o veganismo a todos os públicos e concienciar sobre a necesidade de defender os dereitos de todos os animais (considerados xa como seres sentientes para todos os efectos en España), e coa intención de facelo dun modo amable, asertivo e lúdico.

O Concello de Vigo apoiou unha exitosa segunda que tendeu pontes entre Vigo en Madrid, onde se celebrou a terceira edición. O Pavillón de Cristal de Casa de Campo foi a sede do ano 2023, logo do cal a organización manifesta: “de Madrid volvemos co noso principal propósito cumprido: facer ducias de novas amizades, tanto de asistentes como de entidades expositoras para poder consolidar na nosa cidade un evento que require uns enormísimos recursos humanos e económicos”.  

As entidades expositoras que desexen formar parte do evento xa poden inscribir a súa solicitude a través da web vegana.gal. Todas aquelas que se inscriban antes do 15 de abril, obterán un desconto do 10% no seu espazo.

Polo demais, a organización xa traballa nun programa na liña de edicións anteriores que incluirá demostracións culinarias, desfiles, punto de información nutricional, food trucks, librería, actividades infantís e, por suposto, charlas sobre sustentabilidade, medio ambiente, activismo e dereitos dos animais. Tampouco faltarán as sorpresas que farán do evento un encontro imprescindible para todas aquelas persoas curiosas e comprometidas cunha sociedade máis xusta, sostible e respectuosa.